انواع سائقي التاكسي

عندما تقول: “تكاسي الاردن”، راح يخطر ببالك مدى التقدم والازدهار الذي
نعيشه في الاردن، ويسافر خيالك حتى يصل حدود المدينة الفاضلة، ولكنه سرعان
ما يحط ريفيرس ويرجع على سقف السيل. المهم.. خلينا نحكي عن أنواع سواقين
التاكسي في الاردن:

* التاكسي الهادي *

سايق هاد التاكسي
مش مستعد يتعب حالو ويحكي معك، رايق عالآخر وما بدو يزعجك، خايف على راحتك
الأخ! لا ااااا.. حنوووون.. مبين من شكله. من أول الطريق لآخره ولا كلمة،
يعني مستر(بين) ما عملها بفيلمه الأخير. بس يمكن.. يمكن هه بنص الطريق
يقطع الهدوء بكلمة ” من هون يابا ؟”، بيقولها بطريقة بيقطع فيها خلفك.
عادي تحمل.. ونصيحة: جاوب على قد السؤال أحسن ما يرميك من السيارة.

* التاكسي الفايع *

فش
غيرو بعرف بنات في عمّان، وفش غيره معجّب بحياته ومقطّع الحوت وذيله، ما
بعتقد انو رح يخليلك مجال تحكي، خليك مستعد، رح يحكيلك عن سوسو ولينا
وتمارا وكريستيناوأسماء اخرى لأخر المسلسلات والبرامج والافلام(
الثقافية)طبعا الشبابية ، يمكن تحس حالك بمسلسل (نور) او (ماريا مرسيدس)،
ومش بعيد انو يندمج شوي ويمسك ايدك ويشد عليها (اسلوب توكيد معنوي)، اذا
عمل هيك لا تتحرك ولا تحكي ولا كلمة، خليك طبيعي، بس اذا زادها افتح الباب
وانزل بسرعة أحسن ما تروح فيها!

* التاكسي الدكتور *

هاظ
مليان منه بعمّان، بكون معه بكالوريوس أو دكتوراه.. بس ما لقى شغل يا
حرام.. فراح اشتغل على تاكسي (طبعا هوه هيك رح يحكيلك) ، ويمكن يحكيلك إنو
كان بشتغل مدير شركة في دبي وكان مستلم اكبر مشروع هناك، عاد هوه بعرفش
إلا يعد شلونه (جمع شلن)، ولو تفرجت على وجهه بتلاقي علامات استفهام زي
ماروكو واختها، المهم ادعي انك توصل بسرعة أحسن ما يكون مألف كتاب واحنا
مش عارفين.

* التاكسي الأزعر المقلع *

أهاا، اجينا
للطعطعجي، سايق هاد التاكسي بكون بلعب حديد وكراتيه وتايكواندو وجودو
,وبتميز بالشوارع المرسومة على وجهه،وماخذ دورة عن كيفية فتح
موس بسبع طقات وتعليم هذا الموس على وجه الضحية وتسكيره بأسرع وقت والفرار
من موقع الجريمة, وقمة فرحته لما يسلخ الكف الخماسي اللي ممكن يجيب أجل
المضروب. من هواياته: اللعب بالهاند بريك، والمشي بفاردة عروس،والاستماع
الى موسيقى المجوز (الدبكة). نصيحة أخوية: حاول لا تطلع معه بالتاكسي،
واذا لا قدر الله وركبت معه، اعمل حالك هبيله.. وإذا سب عليك مسبة قوية
طعجك فيها لا تحاول إنك تقاوم، احكيله ولا يهمك والله على راسي قزدرة يا
كبير يعني عشان ما يعرف أنك حفرتل، وإذا شفته شد على حاله، أصبر على حالك
قد ما الله يعطيك ولا تهمس ولا همسه. بتضل المسبة أهوَن من هضاك الكف
!!!!!

--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)--/̵͇̿̿/'̿̿ ̿̿̿ ̿̿̿ ̿ ̿̿ ̿̿̿ ̿̿̿̿'̵͇̿̿--(•̪●)-